Совети како да биде онлајн часот интересен – Прв дел / Квизови

6 совети за креирање успешни квизови на онлајн часови
Квизовите се еден од најдобрите инструменти за проверка на нечије знаење. Една од најдобрите примени на квизовите за наставниците е тоа што овозможуваат да се провери колку ученикот напредувал по одредена област или предмет.

Свесни сме дека основците и средношколците не се големи љубители на тестови и дека тоа не го очекуваат на приватните часови. Меѓутоа, освен што се одличен начин за проверка на знаењето, квизовите можат да ги направат часовите повозбудливи и покрај учењето да донесат и забава за ученикот.
Затоа подготвивме 6 совети како да подготвите и примените квизови на вашите приватни часови и да постигнете најдобри резултати.

1. Поставете цел
Зошто го правите квизот? Што сакате да дознаете преку него? Како ќе ги искористите собраните информации? Ова се некои од прашањата што треба да си ги поставите пред да започнете со подготовка на квизот. Квизот може да донесе многу корисни информации и за напредокот на ученикот и за неговиот однос кон тестирањето и како тоа влијае на неговото знаење.

2. Едноставноста е клучот
За квизови кои се однесуваат на одредена област, нема потреба да се претерува со бројот на прашања. Целта на едноставноста е брзо и ефикасно да се дознае дали треба да се посвети повеќе време на некоја лекција.
Идеалниот број на прашања е меѓу 5 и 10, но понекогаш и едно добро поставено прашање може да даде резултати.
За да одредите која област е проблематична за учениците, можете да користите систем „положил/не положил“ и да идентификувате точното прашање што било погрешно решено, а потоа да се фокусирате на тој проблем.

3. Држете се до темата
Осигурајте се дека квизот е поврзан со темата што неодамна сте ја обработувале. Важно е учениците да останат фокусирани и да не се оддалечуваат од темата за да добиете конкретни информации и да ги пополните празнините во знаењето – област по област.

4. Обезбедете навремени и конструктивни повратни информации
Бидејќи приватниот час е двонасочен процес, исто како и за вас, важно е и ученикот да знае колку научил и каде има празнини во знаењето.
По завршениот квиз и собраните податоци, споделете ги резултатите со ученикот.
Претставете ги информациите како негови силни страни и слабости, со цел да го задржите неговото самодоверба, но и да ги укажете деловите каде што е потребно дополнително внимание. Подгответе го ученикот (а и родителите) за следниот час врз основа на овие резултати.
Заедно со ученикот поминете ги проблематичните прашања од квизот и поттикнете го критички да размислува за лекциите што не ги совладал.

5. Користете различни типови на одговори
Различните начини на одговарање можат да го направат квизот поинтерактивен и подинамичен.
Искористете прашања со повеќекратен избор, дополнување одговори и точен/неточен формат.
Многу е важно да му дадете можност на ученикот да го покаже својот начин на размислување и логиката зад одговорите. Корисен алат за ова се прашањата со отворен тип, каде што ученикот треба да напише свој одговор.

Едно од најдобрите решенија што можете да ги искористите за креирање квизови е quiz-maker.com.
Едноставниот интерфејс ви овозможува да изберете различни типови квизови и теми и само со неколку клика можете да го направите вашиот прв квиз.
Неколку други корисни сајтови за креирање квизови се:

• typeform.com
• classmarker.com
• mentimeter.com

6. Подгответе ги учениците
Кај многу ученици тестовите предизвикуваат стрес и вознемиреност. За да го избегнете тоа, објаснете им на учениците уште на почетокот дека ќе организирате квизови по секоја обработена област и дека тие нема да се оценуваат, туку ќе бидат информативни и со цел да ги направат часовите позабавни.
На овој начин ќе го намалите стресот кај учениците, ќе ги поттикнете да комуницираат поотворено со вас и ќе можете полесно да ги идентификувате нивните специфични потреби.

Колку е ученикот помалку под стрес, толку квизот ќе биде поуспешен и позабавен.
Можете, на пример, да „украдете“ идеја од популарни емисии како Милионер и да додадете неколку смешни одговори на прашањата со повеќекратен избор. Бидете креативни!

Освен што се одлични за проверка на знаењето, квизовите се покажаа и како одличен алат со кој можете да ги направите приватните часови поинтересни.
Покрај квизовите, можете да користите и игри, различни алатки и техники за да ги направите часовите поинтерактивни и возбудливи.

Со оваа тема започнуваме серија блогови во кои ќе им помогнеме на професорите да ги унапредат своите предавања преку забава.
Народски кажано – спој на убавото и корисното!

До следната епизода, пробајте квизови и споделете ги резултатите!