Наслов: Интровертни деца – помогнете им да видат дека нема ништо лошо во тоа

Како родители, природно е да сакаме да им помогнеме на нашите деца. Се чувствуваме наградени кога сè оди добро и го чувствуваме нивниот бол кога работите не одат како што треба. Меѓутоа, кога родителите се интровертни – а имаат и интровертни деца – одлуките можат да бидат замаглени со анксиозност или чувство на сомнеж.

Јас еден дел од мојот живот го поминав како типичен интроверт. Малку срамежлива, не чудна (добро, можеби само малку), но многу чувствителна на тоа што не припаѓав во секое „друштво“ и на општествените ставови дека сум повлечена. Денес, во зрелите години, сфатив дека можам подеднакво добро да се снајдам со својата интровертност во екстровертен свет и дека тоа всушност е моја скриена моќ – или дури предност, особено во улога на родител кога како таква можам да внесам голема доза самодоверба кај своето „повлечено“ дете.

Како да му влеете доверба на своето интровертно дете

Споделете приказни од вашето детство како интроверт.
Користењето на вашите животни искуства може да им помогне на вашите интровертни деца подобро да ги разберат настаните што можеби се случуваат во нивните животи. На пример, кажете им дека е во ред да бидат такви какви што се – особено кога се во училиште.

Драги родители, ве молам, не дозволувајте никој, па дури ни образовните институции, да ја менуваат „Богом дадената“ душа, духовност и темперамент на вашето дете. Мислам на ситуации каде од вашето дете се бара да биде нешто што не е, како на пример:
„Вашето дете е срамежливо, научете го да се јавува повеќе на час!“,
или „Вашето дете не умее да се расправа, мора да научи да возврати!“,
или „Не чита добро, вежбајте со него попладне“ (без при тоа да ви објаснат како треба методички да го подучувате – што е најважниот чекор).

Секогаш слушајте совети што се конструктивни и нудат реални решенија, во согласност со природата на вашето дете, и прифатете поддршка што ќе ви помогне навистина да го разберете и слушнете вашето дете.

Дајте му простор да работи на свој начин.
Мојот прв инстинкт како родител беше да „ускокнам“ и да го спасам своето интровертно дете од нејзината тивка природа кога работите не одеа според очекувањата.

На пример: мојата помала ќерка свиреше виолина и, иако имаше убав однос со својата учителка, не комуницираше многу со неа. Прво сакав да разговарам со учителката во нејзино име, но сфатив дека нема потреба – немаше проблем, само различен начин на комуникација. Го следев нивниот однос и забележав дека тие имаат своја уникатна, инстинктивна комуникација, која не мораше да се пренесе мене „од збор до збор“, но сепак беше многу продуктивна.

Наместо да се мешам, научив да разговарам со ќерка ми на начин што ѝ одговара. Чекав таа самата да се „отвори“ и да сподели што ѝ е важно. Така нашите разговори беа природни и пријатни, а врската меѓу нас – посилна.

Потсетете го вашето интровертно дете дека тишината е моќ.
Постојат повеќе начини да се воспитуваат неверојатни и самоуверени интровертни деца. Иако првиот инстинкт на родителот е често да биде спасител, сфатив дека прекумерната интервенција не му помага на детето да ја изгради својата самодоверба.

Она што можеме да направиме е да им дадеме пример преку сопственото однесување и да им покажеме дека тишината, набљудувањето и внимателното слушање се вистинска сила.

Главната работа што сакам мојата ќерка да ја знае е дека тишината е МОЌ! Со внимателно слушање и набљудување на другите, таа учи како да се снаоѓа во различни ситуации.

Она што ние, како родители, можеме да направиме е да им помогнеме да ги откријат своите таленти, кои не се мерат според стандардни критериуми. Првото правило е: „Не споредувај го своето дете со никого!“

Живееме во општество кое често смета дека тивкоста е „различност“. Затоа, на нашите интровертни деца им треба што повеќе самодоверба и позитивно прифаќање на нивната природа – тоа е клучот кон успехот.

Луѓето со здрава самодоверба уживаат во сопствениот живот, знаат да бидат среќни и со себе и со другите. Таквите луѓе избираат друштво кога тоа им одговара, а не затоа што не можат без туѓа поддршка.

Јасмина Момчиловиќ, педагог

Доколку сакате да закажете консултација, профилот на Јасмина можете да го најдете тука:
https://www.easypass.rs/profesor/jasmina-momcilovic